仲記得早前喺伊巴謙莫域正式加盟曼聯嗰陣，「奧脫福大帝」簡東拿就話過曼聯只有佢自己先係皇帝，不過就唔介意伊巴做王子；而伊巴就寸爆回應話自己唔會做曼聯皇帝，因為佢將會成為曼聯之神！伊巴果然講得出做得到，喺上星期六首次替紅魔披甲，僅上陣四分鐘已射入靚波，協助曼聯喺友賽勝土耳其嘅加拉塔沙雷5:2，果然係「阿爾宙斯」！
助曼聯勝加拉塔5:2
「阿爾宙斯」係乜水？咪就係《寵物小精靈》入面最強嘅精靈囉！佢係寵物小精靈嘅創世神或者元祖精靈（The Original One），傳說中佢以一千隻手創造咗世界上嘅寵物小精靈，所以係最強嘅小精靈，連人氣好勁嘅超夢夢都要屈居於佢之下。都係講番場波，曼聯呢場友賽喺伊巴謙莫域嘅老家瑞典舉行，喺鄉親父老面前，司職前鋒嘅伊巴梗係踢得份外肉緊啦，喺開賽僅四分鐘，就接應路爾斯華倫西亞傳中，喺禁區內背住龍門半倒掛入網，先開紀錄。雖然加拉塔沙雷之後一度反先2:1，而伊巴只係踢咗半場就退下火線，不過，曼聯最後憑住朗尼（兩球）、費蘭尼及桑馬達嘅入球，以5:2勝出。
「普巴嚟到一定更有趣」
賽後伊巴話：「呢個實在係好開始，可以喺瑞典射入自己喺曼聯嘅第一球實在太好喇！大家都支持我，瑞典係我嘅國家，我絕對唔可以喺呢度衰！」雖然法國中場保羅普巴由祖雲達斯轉會曼聯一事一直只聞樓梯響，不過，34歲嘅伊巴就似乎好有信心普巴可以加盟，佢話：「現時曼聯正重建王朝，如果普巴嚟到，一定會更加有趣。我哋拭目以待啦！」
至於伊巴嘅出色表現，就獲得由領隊摩連奴到隊長朗尼嘅稱讚，摩佬話：「我哋今日都見識到伊巴嘅能力。」朗尼亦話：「伊巴係一名好出色嘅球員，佢入嗰球真係好靚，我仲好肯定佢繼續會射入靚波。」
伊巴返到英格蘭後，仲同家人搬離曼聯御用嘅酒店Lowry Hotel，反而入住曼城慣用嘅Radisson Blu。點解？因為Lowry Hotel冇泳池囉，果然夠霸氣！
