「新聞主播」呢個title似乎係一個光環，唔少人希望成為新聞主播，陳美茵（Audrey）喺樹仁傳理系畢業後，先後為大台與now打工，當主播約4年，佢反而認為，做主播嘅晉升機會比較少，即使係比較資深嘅主播，工作性質都係報新聞，未必學到新事物。
佢講笑咁話，好多大型活動，例如奧運會與立法會選舉，都係4年一度，所以做主播這回事，做4年就夠了，係時候試新事物。
咁點解佢唔效法周嘉儀、趙海珠、林燕玲等，轉行入金融界呢，反正佢有個之前做基金分析員嘅男友，應該熟知行情。Audrey就反問一句，點解主播轉行一定要做金融先？「幾個係咁，就變咗做理所當然嘅事？」
佢似乎都係鍾意做新聞多啲，新創辦嘅新聞平台Journesis，名字結合咗Journalism（新聞學）與Genesis（創世紀），希望創立一種獨立而又賺到錢嘅新聞模式。