F1德國站闊別一年後，周日再次喺賀根咸舉行賽事；排第二位嘅咸姆頓一起步就搶佔頭位，呢位平治車手幾乎以由頭帶到尾嘅姿態贏得冠軍，連贏四站，喺車手榜亦開始擴大領先優勢，相信「黑帝」都可以開開心心放暑假啦。
德國站係F1車手喺放暑假前嘅最後一戰，平治車手咸姆頓喺起步搶佔首位之後就由頭帶到尾，以1小時30分44秒200首名衝線，贏得今季第六個分站冠軍，喺車手榜亦以217分穩佔榜首；不過黑帝嘅隊友羅斯保就冇乜運行喇，呢位主場車手喺第33圈嘅彎位扒韋特本頭嗰陣，將後者逼咗出賽道，結果呢次違規行為令佢俾賽會罰咗五秒，最終只能以第四名完成賽事，喺車手榜更加俾咸姆頓拋離19分。至於歷斯亞度同韋特本喺今站就分別贏得第二、三位，令到紅牛今季首次有兩位車手齊齊上頒獎台，亦幫助車隊喺積分榜超越法拉利升上第二。
