韓國男團GOT7前晚於香港亞博館舉行「FLY IN HONG KONG」演唱會，香港成員Jackson有主場之利，父母及朋友捧場外，又風騷地穿女裝跳女團舞。而成員為冧港迷，苦練廣東話獻唱Beyond的《喜歡你》，又唱又跳三小時，非常盡興。
GOT7除了chok爆獻唱多首人氣歌如《Put Your Hands Up》、《Fly》、《Stop Stop It》外，更反串穿上女裝、懶理露出打底褲大跳女團舞，成為全晚高潮，風騷的Jackson更走近觀眾席揈胸，非常搞鬼。之後Jackson又鬼馬地邀請觀眾席上的父母跳舞。GOT7更特別苦練廣東話獻唱Beyond的《喜歡你》，令港迷十分驚喜。
興奮扮比卡超
不過Jackson前日反而不多講廣東話，他竟然用普通話問：「我還是說普通話吧？」港迷即時大叫：「吓？」Jackson才用回廣東話打招呼，不過整晚也以普通話為主，可能是想顧及內地粉絲並懂少許中文的GOT7成員。臨完場前，Jackson就用回廣東話表示在香港開騷是他的夢想，又感慨地表示：「我知你哋每日都好忙，好辛苦同好大壓力，好多謝你哋嚟睇我哋演唱會，唔好令負能量影響你，唔好理人哋講咩，做好你自己。我哋下次去紅館好唔好呀？」最後不忘多謝父母及好友撐場。
而encore時，不少粉絲向台上掟比卡超公仔，據知是因為成員Mark最鍾意比卡超，Mark除了扮比卡超的叫聲外，又一直披比卡超斗篷及攬住公仔滿場飛。GOT7唱足三小時才完場，更承諾下次會再來港開騷。
採訪：梁展雯
攝影：陳順禎