繼日前吳安儀同溫家琪喺埃及舉行嘅世界六個紅球錦標賽奪女子隊際賽金牌後，香港桌壇又傳喜訊！周漢文（Steven）上周六喺男子個人決賽雖然以4:6不敵威爾斯摩根，但已奪得男隊歷來最佳亞軍成績。
Steven上周六喺四強面對曾斷續打過七個職業球季嘅柏傑，雖然一度處於劣勢，但未有自亂陣腳，仲喺關鍵時候越戰越勇，最後以5:3擊敗呢名威爾斯球手。歷史性殺入決賽嘅Steven，決賽對另一位威爾斯球手摩根，喺11局6勝制下Steven一度落後1:4，雖然Steven曾經追近至4:5，可惜最後都以4:6落敗，但仍勇奪男隊首個世界賽亞軍。
賽前最佳成績係打入亞洲賽隊際八強嘅Steven，對距離冠軍只差一步感到少少失望，不過都話係一次寶貴經驗：「始終對手都係前職業手，經驗好兼發揮穩定。都好開心入到決賽，比預期中好，整個比賽嘅發揮唔錯，希望下次再努力。」
今次世界賽港隊共奪一金一銀成績，教練黃德華就話今次比賽除咗有前職業手之外，印度同中國都大派強手參加，所以有呢個成績絕對滿意，尤其係男隊造出歷來最好成績，話希望將來再有更好成績㖭！港隊今午就會由埃及凱旋啦。