紅姑看了近日新聞，忽然長嘆一聲：「香港點解搞成咁？」指的是ICAC、確認書等一連串的事。很多女人關心政治，但不懂得講慷慨激昂的政治語言，往往對時政無從置喙，只能長嘆一聲了事，就像紅姑。
「香港點解搞成咁，其實唔難明，」發叔試圖用她熟悉的語言解釋，「你幻想特首係古裝劇一個地方官，而習大帝當然係皇帝，咁皇帝最憎咩呢？憎地方官無能？得罪人多？都唔係，皇帝最憎謀反。地方官知道自己廢，咁佢可以做咩？自然係幫皇帝平亂。」
紅姑忍不住插口：「謀反係指港獨？所以先唔畀人參選？」
發叔繼續說：「謀反係假，欺君係真。好似港大嗰本《香港民族論》，如果唔係地方官自己炒作，邊個睇？港獨一開始就好似粒蚊癩，你唔理佢自然會消失，但政府偏偏用刀挑，用錘打，搞到佢腫脹發炎潰爛，然後就可以上奏，係癌呀皇上，微臣定當竭盡全力，依法阻止佢擴散。皇上雖然唔妥地方官，但更憎亂黨，見佢個樣忠心耿耿，自然就唔斬佢頭住。」
紅姑說：「聽講入閘選特首嘅條件，係唔可以畀廉署查，所以佢最近郁廉署？」
「聰明！」發叔舉起拇指說。「廉署地震無幾耐，佢就搞咩確認書。確認書無法理依據，好似無啦啦整撻瘌，但呢個正正係地方官原意。首先，佢最怕人日日提住佢畀老廉查，確認書一出，成功轉移晒視線。第二，地方官最鍾意亂，最好你揭竿起義，皇帝一鬥氣，就會畀佢繼續去馬。第三，地方官第一個想整嘅人，唔係雙曾，而係佢一手扶植、好打得嘅娥姐。娥姐最近搞咩？之唔係搞神憎鬼厭嘅確認書囉，順手拖低埋你民望，一石三鳥。」
紅姑聽完這些陰謀論，「唓」了一聲說：「都唔知真定假！」發叔立即回一個「挑」字，然後說：「政治邊有真假，人人都係想弄假成真啫。」