日本央行忍手不擴量寬間接宣判「安倍經濟學」失敗。 香港人帶住貴Yen去旅行，日本人繼續與貴Yen生活。日圓滙價轉強到101水平，每百日圓兌港元報7.6算，相對兩年前低位6.2算，升值超過兩成。
日本一碗牛肉飯都可以體會喺「安倍經濟學」下嘅辛酸。四年前，安倍射出第一支箭，日圓應聲貶值，日本人只覺到Yen越來越唔見洗。日本打工仔平均薪酬升幅跑輸通脹，財務省統計話2012年到2015年嘅薪酬升幅平均按年升1.7%，低過通脹升2.9%。計入通脹後，日本打工仔實質薪酬按年倒退4.6%。
日本人生活水平持續下降，可能喺街度見到日本人仍着得光鮮，實質生活預算上，衣、食、住、行四大範疇，日本人最捨削減食嘅開支，寧願食平啲，堅持繼續執靚仔啲。所以專攻日本平民生活情報嘅「原價率研究所」有得做，做200 Yen嘅咖哩炸豬排飯專門店，生意越做越有。
帶住貴Yen去旅行嘅香港人未必對200 Yen嘅平價咖喱炸豬排飯有興趣，去日本撈隻勞力士可能仲吸引。日圓貴咗，但飛去日本買「勞」仲有價格水位。白金系列嘅「百事圈」GMT II香港賣緊297,900元，日本賣3,888,000日圓；扣除8%消費稅約3,576,960日圓。即使每百日圓兌港元見7.6算，日本入手嘅白金系列嘅「百事圈」GMT II都只係27萬港紙左右，難怪港人Yen再貴都繼續去日本旅行。
Captain Cool
https://www.facebook.com/seeforcaptain/
本欄逢周一刊出