最近好「R」頭，又VR（虛擬實境），又AR（擴增實境），做娛樂或科技嘅公司，好似唔「R」唔得，最近連中國3D數碼（8078）主席蕭定一都話想湊熱鬧，計劃拍《一路向西》或《肉蒲團》VR版。
蕭定一認為，香港娛樂發展落後，對手只得樂視與TVB（511，電視廣播）嘅myTV SUPER，所以佢打算推出HMV Play玩埋一份。
為求吸客，佢會製作VR版《一路向西》或《肉蒲團》，「以前唔會拍冇中國市場嘅戲，但為咗HMV Play會拍」。但由於製作VR電影嘅費用高昂，VR部份可能只佔5至10分鐘，佢笑笑口話「5分鐘夠喇！」
吸完客就要諗留客嘅內容，佢話，好多電影喺中國嘅版權可能值幾千萬，但海外無人問津，佢可以低價收購佢哋嘅海外版權，再加上旗下公司每年製作8至12套電影，有信心內容充足咁話。