27歲前新聞主播陳美茵（Audrey）最近辭掉now主播一職，與曾任對沖基金分析員嘅男友Joey合作創業，成立名為「Journesis」嘅新聞平台。
Journesis目前只得Audrey與Joey兩人全職經營，兩人冇養家負擔，可以用積蓄實現理想。唔願曝光嘅Joey做金融出身，負責度計搵錢，計劃賺錢模式，佢認為，「好多新媒體根本冇諗過點樣賺錢，傳統媒體又唔識點做新媒體，中間應該有好大嘅賺錢空間」。
佢哋兩位籌備咗呢個新聞平台幾個月，今日（1日）正式推出。Audrey話，呢個平台有別於一般公民新聞平台，佢哋冇任何編採指引，記者基本上係freelance形式參與，每位都係自己老闆，佢哋只需要專注做content maker，Journesis就幫佢哋搵廣告。
舉例說，如果記者專門寫信用卡新聞，Journesis可以幫佢搵銀行廣告，雙方之後拆賬，記者佔廣告收益一半以上。Joey指，記者嘅文章多人睇，就會分得多啲。目前有60名記者與Journesis合作。
Audrey亦希望，Journesis可以有傳統媒體嘅公信力，亦可以做到我手寫我心，唔受大機構編採限制。為增加公信力，參與者要係讀新聞傳播出身，或者有傳媒工作經驗，「編採係完全由大家決定，係由大家決定呢個平台變成點，相信會好有趣」。