超級區議員唔易做，睇睇白鴿黨涂謹申就知道！話說4名港人近日喺菲律賓被指船上製毒及藏毒，其中有被捕港人嘅家屬就向冤情大使阿涂求助。
為免港人陷冤獄，阿涂放低咗選舉工程，日前飛去菲律賓馬尼拉了解佢哋嘅情況，前晚深夜先返港，噚日朝早8點已經出席選舉論壇，認真忙碌！
八方問過阿涂，佢話此行都有難忘經歷。有日佢要同一位當地律師及4名被捕人士喺戶外曬住錄口供，但由於天氣實在太熱，佢哋講咗唔夠半粒鐘，着住恤衫嘅阿涂已經露兩點，過多兩粒鐘之後，直情「燒機」咁滯，索性除咗件恤衫。
點知獄警見到佢赤晒膊，即時命令佢着返件衫，但係就准許佢唔使扣鈕，搞到在場嘅被捕人士同家屬都忍唔住笑佢！