大家有幾耐冇去過真‧街市？即係個地下濕𣲷𣲷嗰隻！喺港島區出戰嘅民建聯張國鈞（圖），噚日朝早同喺超區議席爭連任嘅主席李慧琼，各自帶咗一隊人殺入筲箕灣金華街街市，各自以50蚊買三餸一湯，睇吓邊個先係買餸能手。
企鵝男張國鈞自爆十幾歲已經開始喺街市流連（而人哋十幾歲仔，可能係蒲機舖㗎噃！）因為雙親要開工，煮飯重任落喺佢身上，番茄炒蛋同菜心炒牛肉係撚手小菜；出身後就好少去街市，但間中都有陪老婆買吓餸嘅。今次重遊街市無非係想支持下檔販，因為唔少人𠵱家寧去超市唔去街市買餸，但查實街市更加平靚正。
點解唔見排第二嘅鍾樹根嘅？而Tree根同李慧琼似乎唔多啱key……張國鈞話Tree根呢兩日咁啱出門，好快歸隊。