踏入8月業績期，又係分析員忙住寫報告嘅日子。今年銀行股有個奇怪情況，往年銀行股，多數由東亞銀行（023）打頭陣，但去到噚日，東亞都未宣佈邊日公佈業績。此外，滙豐控股（005）與恒生銀行（011）十居其九都係星期一公佈業績，今次忽然改為星期三（3日）。
向滙恒方面八卦過，都冇人講得出點解今年中期業績由周一改為周三宣佈，可能有董事事忙啩，事關上市公司公佈業績當日要開董事會，獨立非執董並非全職瞓身做，或者有人唔得閒，等到周三先齊人喇。
至於東亞，佢夠晒頭痕，早幾個月先至裁員180人，又成日俾對沖基金股東Elliott狙擊，年初要求東亞賣盤不成，早前直情入稟告佢，東亞一班董事可能忙到一頭煙，未得閒定實邊日公佈業績，最重要係等主席李國寶背熟書，你知喇，去到業績會，佢肯定要接大堆問題。