如果《Pokémon GO》係港資開發，伺服器喺香港，相信警察已經上人哋辦公室拉人封艇兼攞電腦走。好彩《Pokémon GO》真正嘅班底同伺服器都唔喺香港，港人先可以享受捉精靈嘅樂趣。
每次有新科技出現，都係對政府「發展科技」嘅一面鏡，而每次政府嘅反應都確認，佢行動上反對發展科技。警方要市民遊戲集會時先通知；教育局話會向遊戲管理公司反映學界意見，禁止精靈在學校出沒。
一開口就知，兩個部門其實唔識嘢。一、冇人會集會玩，只係嗰度有精靈就一窩蜂去捉；二、《Pokémon GO》嘅AR技術好可能係未來創富嘅來源，小朋友應早接觸；三、學校有校規禁止學生返學玩遊戲機或電話，教育局用政治權力施壓，本質上亦係抗拒新科技嘅反應。
不過警方、教育局未必有足夠智慧理解《Pokémon GO》。佢哋唔明，政府有創科局局長，可以解釋畀佢哋聽，擺平政府內部對新科技嘅恐懼。只要社會有問題存在，就會有人諗用新科技去解決問題，創新科技行業就會產生。
過去10年香港科技面對最大問題係，政府一唔明，就會拉人封艇。經典例子係10年前免費分享影片嘅「古惑天皇」，只要改少少經營模式，今日已經係Youtube、PPStream等，但政府當年就用不誠實使用電腦拉罪咗佢，眼白白將數以百億美元嘅科網概念送咗畀其他國家。
10年來，世界科技界已經走到好遠，美國唔再講，中國嘅代表騰訊（700）同阿里巴巴，睇股價已知咩事。香港政府成日推搪冇科技，因為冇科技局。好啦，今日有創科局，對於《Pokémon GO》呢啲新科技，創科局無法擺平政府內部勢力，超過10年香港對科技嘅爭議，都仲係停留喺禁定唔禁嘅舊禮教階段，創科局連少少功能都發揮唔到，只係養住一眾庸官，𠵱家廢咗創科局都嫌遲呀！
高明
http://www.fb.com/bigricetea
本欄逢周一刊出