前胡廐馬大幅減分何其多，除了「左右逢源」之外，「齊齊健康」亦係評分大利之馬匹。
「齊齊健康」前季在告東尼馬房兩捷，上季初轉咗去胡森度，表現不進反退其實都唔意外，但陣上跑法真係眼冤，差不多次次都留到包尾入直路，咁跑法你估佢係「巴基之星」咩，不過佢又經常以極強後勁追番近，曾經評46分後上跑過第四。
家陣「齊齊健康」已跌到去歷來新低的31分，胡森散倉後由方嘉柏接手，查番咁耐以嚟，方嘉柏只接手過一匹胡森馬，就係上季暑期嘅「索咖啡」，結果後駒上季就交出兩WIN成績，而且更升至78分之新高。依此推算，假設「齊齊健康」目標只係去番46分，相信都有兩至三場頭馬在手，新季跑中距離可長線跟進。