林心如同霍建華選擇咗喺「天堂之鳥」峇里舉行夢幻婚禮，而昨日50歲生日嘅溫碧霞，同樣選擇咗去峇里過生日，佢昨早在微博度放閃，貼出一輯火辣嘅三點式相。
着住火紅色三點式嘅「海潮」look溫碧霞，晨早就去咗酒店嘅泳池玩水，慶祝50歲生日，之但係點睇都唔覺得佢有50歲囉，唔怪得佢留言「留住美好的這一刻，I love Bali」。
其實佢出發前都已經喺香港搞咗個生日派對，當時老公何祖光都有出席，問佢有乜生日願望，佢就話：「奢侈嘅嘢又唔需要，反而今年想再起學校，我哋之前已經喺貴州起學校，因為老公鄉下喺貴州，地方好窮好多山又缺水，好多小朋友冇書讀，起學校有意義，生日應該做有意義嘅事，仲想起多啲水井，唔想當地人缺水。」