記者小G有親戚自美國來，要回美前飲一餐有英國色彩嘅下午茶，小G請左丁山介紹，於是叫佢去半島酒店大堂排隊（通常兩點前已有人龍），或者去文華東方酒店Clipper Lounge排位。小G話邊度有時間排隊呀，半島唔去嘞，打電話去問四季，哦，有位訂，不過已經滿座，再去問文華，咦，原來左丁山太耐冇去，唔知道人地已經現代化，可以在網上訂位，小G大喜，晨早七點幾就去上網訂下午三點半，得咗！於是左丁山叫佢記得食多件英式鬆餅，文華咖啡室出面嘅小餅店好好生意嘅，買鬆餅要下午三時先至有，早啲去要等，遲啲去呢？賣晒。提子麫包亦搶手，左丁山幾次午飯後去買都買唔到，店員提議左丁山預訂。唔係呀嘛，買麫包都要預訂，索性唔買。
四季酒店咖啡室咁好生意，有老友話因為基本擁躉多，北望樓名不虛傳，有不少人每日從樓上落嚟飲下午茶之故。年青賓架T曾經事有湊巧，一連三日受人客邀請到龍景軒吃午飯，每次佢都見到一位比佢年紀大少少嘅內地客手持手機，講個不停，有時有人陪同，有時獨自一人，衣着並不特別出眾，但夥計對佢極之客氣。卒之一位客戶細細聲對賓架T講：「唔好得罪佢呀，佢係內地大富豪。」
內地富豪雲集北望樓，以前本欄講過，就是習大大剷貪腐嘅副產品，富豪與高幹高官以至軍頭有親密關係，並非秘密，風頭火勢之際，因人人都一早攞咗香港身份證，索性在港寄居一段長時間，十分正常。
賓架T嘅校友會計E去某會所玩罷，在大堂門口等車之際，聽到一位實Q對大軍頭郭伯雄判無期徒刑之事，同另一位會員猛咁傾，傾乜呢？實Q用唔鹹唔淡嘅廣東話講：「習大大拉晒佢地，軍隊有希望，我以前係退伍解放軍，我地好打得㗎，但上頭指揮官軍長師長一路數起來，都係買官上位，唔識指揮打仗嘅，我地海軍如果反美打起仗嚟，又會係甲午之戰翻版。徐才厚、郭伯雄賣官，直情害死解放軍，應該打靶。」嗰位會員聽完唔敢答嘴，會計E又摸唔清位實Q係乜嘢人，詐作聽唔見。賓架T問左丁山：「解放軍是否真係得個樣？」邊度識答呀，問馬鼎盛呢位真正專家啦，賓架T又問甲午之戰中國敗因，只好簡單答一句：「英國記者參觀北洋軍艦，見到水兵在艦上曬衫，報道出嚟，日本人就知道可以打贏！」