要數上季最開心的騎師，非莫雷拉莫屬，全季破紀錄168Win，相比之下，4月尾才開始客串期，堂堂新西蘭冠軍級騎師寶遜在港「食蛋」近2個月，6月中才憑「大把籌碼」打破悶局，手風突然轉順，之後再贏多3場頭馬唞暑，由低谷反彈，可謂苦盡甘來。
唔少人曾經擔心寶遜上季會冇馬贏而唞暑，他有冇檢討過點解咁遲先贏到馬？寶遜說：「我嚟香港發展前，已經知道香港競爭非常大，一定唔易生存，但我都決定接受挑戰。喺4月開始客串，時間唔係最好，因為大部份質素好嘅賽駒，已畀其他騎師卜晒，上季3個月嘅客串期好似打逆境波咁，記得客串期第一日就騎『經典寶寶』僅僅影相輸畀『榮光大道』屈居亞軍，如果影贏，之後際遇可能好唔同，好在去到6月成績大有起色。心理上我已經準備好迎接新季。」
新西蘭和香港競賽模式有何分別？寶遜說：「喺香港騎師一出閘之後就爭分奪秒，以最快速度搶位、楔位，但如果最終跑獲嘅名次，稍唔符合練馬師或馬主嘅預期，下一場我就隨時會被換掉，香港有太多好騎師啦！喺新西蘭，陣上有較多見習騎師，甚至兼職或業餘騎師，呢個就係兩地之間嘅分別。」
記者：林湛穎