【本報訊】弄孫為樂，首要懂得「湊B」。換片後用爽身粉？餵完奶先掃風？上一代的育兒方法或許已不合時宜。為迎接首個孫兒誕生，一班新手祖父母跟護士學習育嬰知識，聽社工講解幼兒心理「升呢」，只因要不負子女所託，擔起湊孫重任，更要為退休生活另覓人生寄託。
記者︰王家文
「同以前真係好唔同，𠵱家學咗，唔會用番以前唔啱嘅方法。」今年9月榮升祖母的林太近月忙於為湊孫作準備。她說以前湊女餵完奶才掃風，但原來餵到一半就要掃，減低嘔吐風險；昔日替女兒換片後亦慣用爽身粉，原來也是錯誤做法，因嬰兒吸入粉末會影響呼吸；林太又說︰「清潔臍帶以前會用酒精，但其實用乾爽棉花棒清潔就可以」。
學員︰媳婦問番我轉頭
社會福利署今年3月推行免費的「為祖父母而設的幼兒照顧訓練課程」試驗計劃，為期2年共540個名額，並委託9間培訓機構協辦，至今招收約200人。課程提供60小時訓練，教授照顧初生嬰兒及6歲以下幼兒的技巧。林太跟丈夫是首批畢業學員，林先生笑說不時在家中抱起公仔做實驗，「驚唔記得點湊，都30年啦，我都唔記得點樣掃風」。他憶述女兒襁褓時常怕她吃不飽，經常餵奶，「瞓咗覺都叫醒佢飲，試過好多次都嘔番出嚟」。經護士提點，他才了解到嬰兒的胃不如想像般大，「糾正咗我哋錯誤思想」。
不是所有祖父母都有育兒經驗，李氏夫婦以前工作忙，把兒子交由父母照顧，孫女快將出世，輪到兒子交託重任，李先生笑說「好恐慌」，「諗起個BB軟腍腍點去應付呢？我連抱都唔識」。
夫妻一同上堂，經過連串受訓，溫故知新，李先生已成半個專家，「𠵱家個媳婦問番我轉頭，用乜奶樽好，食邊隻奶粉好」。
除了因為女兒交負重任，林先生不放心把孫女交由外傭照顧，「又要做家務，又要湊B，好易分心」；反正他和妻子退休多年，去得旅行多也厭倦，「𠵱家學咗（湊孫）或者係第二份工作，可以有個寄託，跟個女同女婿關係會緊密啲」。