港漫迷,盡情葡萄我吧!這晚,記者與袁家寶、畢亦樂、亞傑多、葉明發、鍾國光、梁光明、梁偉家、米奇、麖迪,還有曹志豪同枱食飯,佬味達到20,000%。如斯陣容,三年前,或者連一眾主筆都未曾預料。能夠凝聚各路漫畫豪傑在餐桌上口沫橫飛的,竟然是一位漫畫迷。
他叫吳其翰(Eric)。他迷到甚麼程度?迷到心願是開設本土漫畫主題餐廳。可是哪!有!錢!於是他最近在屋企經營的茶餐廳掛上幾十幅珍藏港漫作品,當中有真迹,也有複本,引來港漫迷朝聖,盡情攝,起勢影。他笑謂:「佢哋唔係想來食我餐廳的出品,只係希望來睇下香港知名漫畫主筆親筆畫同手稿。」
食住雲吞麵,飲啖凍檸茶,睇到李志清的《關雲長》等的真迹,件事係夢幻嘅。店內展出的作品,有的是他購下,大部分是漫畫家朋友獻畫。一個在漫海浮沉多年的迷途小粉絲,點解可以得到多位偶像力撐?一切從佢地殼咁厚嘅面皮開始。漫畫家曹志豪繪形繪聲地說:「有個讀者聚會,無啦啦有個人埋來自我介紹,話『我有睇你啲書』,成個土霸王咁樣。讀者通常都係好有禮貌,驚驚青青,佢一來就好似好熟咁,不過傾開又覺得幾啱傾,慢慢變熟絡。」
問各位漫畫家這名港漫死忠是個怎樣的人,出現頻率最高的,是個「真」字。這兩三年間,他以真性情認識這個,又結交那個,這位在主筆眼中「有意思」的書迷,變成了可以互相訕笑的真心friend。袁家寶讚他是個有心人:「有時我哋畫啲親筆畫畀佢,佢會唔話畀我哋知,印一塊畫板送番畀我哋。」梁偉家則說:「我哋表面係識咗兩年,但佢識咗我哋好耐,講得出我哋過去同依家嘅作品。其實依家點畫,銷量都冇以前一半,但有一班人無論環境幾差都支持,呢個就係我哋畫落去嘅動力。」對於街坊格局,貼地到貼地,沒有豪裝的餐廳,他謂:「呢間係最正嘅餐廳,其實好豪,喜歡的話,係價值不菲,你話要訩走佢一張,要佢條命好過。」
亞傑多認為以港漫包裝小店,如能變成特色景點,絕對是美事。這晚他帶同心機畫作贈予Eric,似乎這小小的餐廳,將又有多一幅「火雲邪神」畫作了。葉明發也喜歡這裏不時有新作。「一年一次動漫節,先有多啲畫讓大家睇到。呢度開放式,隨時有新畫。」梁光明認為這裏比灣仔「動漫基地」大眾化。「呢度好多畫家作品都有。灣仔動漫樂園有雕塑公仔,但公仔是cute版,冇咗神髓。」
一個狂迷﹐一家餐廳,為一眾漫畫家多了食飯吹水的機會。雖然席間他們不斷大嚷:「訪問先有蝦食,平時食腐乳。」、「真係托你鴻福」、「係咪你哋影完就會收走啲餸」,笑到記者腰歪牙骹軟。麖迪謂:「好少一群主筆聚埋一齊,有呢個陣容其實唔易。」Eric說:「飯局經常有新主筆加入,大家互相認識,聯盟越來越大。」我會說他們是真‧正義聯盟,堅過石堅做實事。
2014年,Eric希望送賀年糕點給餐廳附近老人中心的長者,一班漫畫家義不容辭,繪畫吉祥年畫整靚個糕。除了一班漫畫家老友,連大師級的邱福龍都出手相助。Eric說:「我哋真係冇沒見過面,我只係响facebook私訊問佢,邱先生二話不說就畫咗幅壽星公畫。」翌年再辦送糕行動,畫作已由六幅變成十多幅。「呢群主筆,多數畫武俠漫畫,當中講嘅俠義,我真心體會到。」書中的俠義精神透過筆觸,其實也同樣傳到這名漫畫迷的心中吧!
今年他更邀請18位漫畫家朋友畫畫作慈善拍賣,讓粉絲競投,最終籌到六萬多元善款。餐廳門外的大海報,印上各位漫畫家以筆行善的證明,去朝聖,還請細心欣賞。
地址:屯門兆康商場1樓220號舖兩合特色餐廳
記者:葉青霞
攝影:鄧鴻欣