35歲的寶遜騎師生涯迂迴曲折，曾經喺2003年掛靴，但幾個月後復出，究竟當時發生乜嘢事？
寶遜說：「我15歲成為見習騎師，然後一直做騎師，自己喺大約21歲嗰陣，內心好厭倦比賽，開始暴飲暴食，一系列垃圾食品如炸魚薯條、多油食物等，我越食越多，體重升到去78公斤(超過170磅)，索性掛靴，轉做騎馬人，並為一啲只得1歲嘅未出賽年幼純種馬安排基礎訓練。」
寶遜續說：「我又鍾意打欖球，即時加入當地一間業餘小球會，擔任中衛(half back)，負責分波畀隊友進攻或防守，自己仲係全隊最矮細嘅球員。」
如果寶遜一直打欖球，不斷改善球技，話唔定成為職業欖球員？他說：「未必啦，因為我太矮，雖然曾經都試過達陣過3、4次，但好快我就發現賺得不多錢，只是每打一場比賽後，賺到一些車馬費。如果繼續過呢種生活，我的生活會有好大問題，最終一輪地獄式減肥，我重操故業，經歷過呢次，感覺到自己會更集中精神，知道自己真正想要啲乜，成熟咗。」
記者：林湛穎