相信球迷打機嗰陣，都希望自己嘅球技好似遊戲入面咁勁！不過，原來有人掉返轉，佢就係應屆普斯卡斯獎得主利拿。利拿半年前先上過國際足協金球獎頒獎台，家陣佢玩厭咗用腳嘅現實足球，決定掛靴，轉戰用手掣玩嘅虛擬足球。
虛擬世界尋夢
利拿係邊個？一個曾經擊敗美斯嘅男人。27歲嘅巴西前鋒利拿喺今年初嘅國際足協金球獎頒獎禮上，力壓巴塞隆拿前鋒美斯同羅馬中場費奧倫斯，獲得普斯卡斯獎。利拿嘅金球喺舊年3月11號巴西嘅戈亞斯州錦標賽射入，佢當時喺禁區內施展高難度嘅斜身窩利射門抽入。半年過後，佢因為受傷患困擾而宣佈退役，但佢話要喺遊戲世界繼續追夢喎。
球員時代喺巴甲低組別聯賽打滾嘅利拿話：「我人生有兩大夢想，就係做職業球員，贏好多冠軍，但好難實現嘞，始終呢度係巴西。踢咗15年波，有開心有唔開心，亦試過同大球星比賽，永遠唔會忘記呢啲時刻。另一夢想係做機手，聽落冇可能發生，但上天俾我呢個機會。」利拿會撈番老本行，打足球遊戲《FIFA》，做職業機手兼youtuber。據報，利拿試過同《FIFA》嘅世界冠軍過招，炒過對手六比一。
機手身價隨時千萬
雖然打機聽落係廢青行為，但打機打得勁都可以百萬年薪。憑利拿現有嘅名氣，相信幫到佢成為「巴西達哥」。喺某啲國家，打機已經係正式運動，官方名稱叫電子競技，喺中國、南韓、台灣同北美都發展蓬勃。我求大俠睇番啲報道，全球職業電競選手平均月薪超過四萬港紙，而港、澳、台地區嘅月入中位數係8,000到1.2萬。喺內地，如果頂級嘅機手轉會，轉會費數以百萬計，甚至過千萬。家陣都有唔少香港機手喺內地搵食，身價成千萬㗎，仲高過香港啲足球員。
好多職業足球員都鍾意打機，例如美斯都係狂熱分子，但數到有職業水平，就一定要講前美國國腳賀頓。賀頓已經掛靴，球員時代踢過新特蘭同保頓，佢做球員之前係職業機手，主力打CS（Counter-Strike），佢嘅團隊喺世界大賽都有唔錯嘅成績，但後尾為咗踢波放棄做機手。