動漫節為一眾宅男血拼的日子，灣仔會展隨即變戰場。不過，就算要死慳死抵買心頭好，亦不等於要冇啖好食。銀彈有限的情況下，如何既飽肚又不至於劣食？不用$30，帶你尋找三間灣仔小店，足料抵食，不必捱麥記。
$29嘆經典芝士大Pizza
夏日炎炎，都無阻對pizza的意慾，番茄醬酸咪咪，配上啖啖芝士，十分邪惡。由灣仔站C出口步行約5分鐘 ，離遠已見店員Hema於百多呎的店內團團轉，之後將「大過頭」的pizza遞給客人，一塊經典芝士簿餅，承惠29元，屬店內最便宜。由搓麵團，到「畫圈圈」將pizza醬塗上，再來到「重頭戲」灑上一堆又一堆的芝士條，一般pizza焗約7分鐘便可出爐，中途要不時轉一轉，再輕掃一層橄欖油便大功告成。最後，將pizza切成八大塊，整個製作過程不消15分鐘。提提你，收銀機旁有四款調味粉，分別是羅勒 、鹽、芝士及紅辣椒，任君選擇。
Big Pizza
灣仔駱克道89號灣仔中匯大廈地下5號舖
$20新鮮三文治果汁餐
有時飲水飲到「口寡寡」，又唔想飲咁多人工飲料，於地鐵站A3出口出，沿莊士敦道行約6分鐘，就會見到李節街的「天天鮮果汁」。一份足料的新鮮三文治，再加鮮搾果汁，感覺剛剛好，不會撐住肚皮，最適合要快手快腳奪得心頭好的宅男們。 套餐有六款三文治，老闆娘羅太向我們推介餐肉煎蛋加蔥，即叫即整，加蔥不用加錢，落單時講聲便行。另外，跟餐的精選果汁並非每日一樣，記得留意。
天天鮮果汁
灣仔李節街12D地舖
$17 足料雙單併粉麵
想坐定定的話，走入灣仔玩具街，若你夠眼利，很快就會見到「粉麵17元」的紅色招牌，不論顏色或價錢都相當醒目。牛丸配鯪魚球河、雲吞麵、自製墨丸配魚皮鮫麵、自製魚蛋河……通通20元有找，就算整多碟油菜，都只是23元，十分抵食。
權記雲吞麵
灣仔交加街10號舖地下
記者﹕湯珮然
攝影： 伍慶泉
