一日24小時，「等待」的時間其實都佔唔少，等電梯、等車、等「叮」飯，仲有等捉小精靈.......呢個時候有冇諗過試下做「喪屍體操」？過去一年呢種體操風行日本、台灣兩地，淨係日本都超過50萬人跟住做，好似喪屍咁，完全放鬆肩膀手臂，原地不停郁下手腳，聽講咁就可以有效預防到心血管疾病，有無咁勁揪？
曾經出版好幾本書講心血管疾病的日本內科醫生池谷敏郎，眼見都市人往往因為天氣太熱或太凍、無時間或唔想出門等藉口而唔願做運動，有見及此，他去年3月出版新書《強化血管、骨骼、肌肉！喪屍體操》(血管・骨・筋肉竾強禀𩄍𥪯！𦐒肧𧄧体操)，分享一套他以30多年行醫經驗，發明了喪屍體操，唔使任何器材和指定地點，只需用少少時間同有限空間就可以做到的簡單運動。本書聲稱每日至少做3分鐘，血管就能夠年輕化、有效預防心血管疾病，包括心肌梗塞、骨質疏鬆，甚至腦中風同癌症，真唔真啊？
香港浸會大學體育學系副教授雷雄德說，當一個人靜止時，每公斤每分鐘所使用的能量，會稱之為「代謝當量」(Metabolic Equivalent，MET)，「世界衛生組織建議，都市人如果運動中要得到健康效果，需要去到3至6個METS，例如緩步跑約3至4個METS，打場籃球或足球比賽，就介乎6至8個METS。」至於喪屍體操，雷Sir指出，動作主要使用下肢和身驅肌肉，看起來可達至約3個METS，與緩步跑相若，「要視乎個人跳起時離地有幾高、做的時間有幾耐而訂定MET，如果能一次持續做10分鐘，早、午、傍晚各一次，每日累積30分鐘，健康效果一定存在。」
至於是否有效預防心肌梗塞等，雷Sir就話呢方面要等科學上進一步求證，不過多做跳躍，唔少文獻證實對預防或延緩骨質疏鬆有一定幫助。話雖係街做喪屍體操，途人好有可能會用真係當你係喪屍的眼光看待，雷Sir指大原則係「有運動總好過無運動」，對於平日極少運動，假日坐定定連續煲劇數小時，或返工由朝坐到晚的人來講，喪屍體操都算係一套簡單快捷的簡單運動，畢竟係家或辦公室隨時都可做到，同時對於經常用電腦工作或用手機的「低頭族」(或者一眾精靈訓練員)，不妨疲累時試做數分鐘，都有舒緩頸部和腰部肌肉的作用。
另外雷Sir亦都提到，如果想效果更好，扮彊屍跳可能仲好，「遞高雙手擺動時，相對喪屍體操，肩膀、前臂都有足夠能量消耗，始終愈多肌肉參與，能量消耗效果就愈好。」
記者：余瑋
攝影：陳永威、楊錦文
想輕輕鬆鬆健康?，記住留意健康蘋台
http://health.appledaily.com.hk/