人人都叫佢做「阿頭」，加入航空業25年，2003年創立英國航空香港工會，曾經同英航打足6年官司、成功令24名空姐復職；去年亦有份成立香港空勤人員總工會兼做埋主席，CY女頌昕嘅行李門事件關乎航空安全，佢一直咬住唔放；左派鬧佢勾結泛民，資方嫌佢聲大夾惡，但佢冇有怕，做埋職工盟首位女主席，佢係吳敏兒（Carol）：「邊個話女人唔得？」
爭取標時退保
Carol接替潘天賜校長當選職工盟新主席，之前高票當選執委成票后。Carol話參選主席都諗咗一段時間，因為做主席好大使命，偏偏佢包拗頸，覺得冇理由女性做唔到，有人推舉就當仁不讓。工運多數男性主導，但佢話女性其實有着數，叫大家幫拖仲容易啲。除咗推動工會年輕化，爭取標時立法、全民退保以及反年齡歧視立法都係佢任內目標。
身兼3個工會主席兼做空姐，老公唔詐型就驚，Carol話盡量每晚返屋企食飯陪老公，「遲早份工都唔使做」。爭取勞權多年，Carol有感要為工人發聲，進入議會係難以避免，唔排除將來選立法會㖭呀！