【旅遊籽】慳皮度暑假　$220住汀九海景旅舍

【旅遊籽：假日散心】
熱到溶化的夏天，想避世度假，窮到燶冇得遊埠，又想涼冷氣，住旅舍就啱晒你。嫌離島太偏遠？市區附近也有隱世青年旅舍，仲送埋海景！最近汀九一間服務式住宅把部份房間包裝成校園風旅舍，以低價吸引本地及海外大學生，亦歡迎你呢啲渴望放暑假嘅港人，每位最平只需$220就可宿一宵，仲唔約埋三五知己梳乎吓！

烈日當空，身穿背心短褲的模特兒Fiona在荃灣港鐵站，等候前往香港校園旅舍（Campus HK）的免費接駁巴士，猶如重溫昔日上學等校車的青葱歲月，之但係明明話放暑假喎，搭校車做乜？媽，好亂呀！原來位於荃灣青山公路汀九段旁的服務式住宅汀蘭居，五月中開始把其中48間房共192個床位變身成校園風裝潢的旅舍。即係返學等於度假，正喎！
旅舍市場部總監Marc Bichet表示，旅舍主要讓本地或外籍大學生入住，不過本地旅客亦可日租。房間算大，面積660平方呎，有四個床位，適合四位朋友共度周末。記者決定帶備金睛火眼，走進去看看它的設施孰優孰劣。

每人只需$220起，便可在像大學宿舍般的海景四人房放空，旅舍設雪櫃放食物，品牌是意大利的SMEG，十分講究。設計圖片

房間窗外可看海景，對面便是青衣。

床位附設拉簾，提高私隱度。

床頭設USB插孔叉電，十分貼心。

天花圖案模仿黑板設計，印有鼓勵字句及圖畫，具有校園氣息。

廁所以白色為主，漂白水味略嫌濃烈。

廚房設備齊全，但調味料及清潔用品需自行攜帶，洗潔精旅舍有售，每支$22。

夠細心　USB叉電床位有拉簾

不用十分鐘的車程就到旅舍門口，Fiona一個箭步走到登記櫃枱，付$220房租後，收到房間門卡，過程好似住酒店check-in咁。入到房走到窗前，觀賞海景及青衣景致，實在寫意。除了靚景，特色裝修都係房間賣點，白色牆身配高腳椅、木枱，綴以pop art風掛畫、仲有外形懷舊的雪櫃，舒服雅致。外國有些青年旅舍，規定進房要脫鞋，慶幸這裏沒有限制，不用帶拖鞋都可在房間紮紮跳。天花仲有塊偽黑板，寫上「當天空是灰色，你令我重現笑顏」等英文鼓勵字句，已離開校園N年的你我他，有否勾起那些年的少男少女心事？走文青路線的，可以在闊落的木桌上看小說，喜歡玩的當然可以同朋友玩board game啦！
閱讀累了，來個午睡。有別於外國青年旅舍設計，這裏只設上格床，下格床位置是書桌。Fiona爬上長6呎半、闊3呎的床，有足夠的空間滾來滾去，最貼心之處是床位前有小簾，可增加私隱度，不用給陌生人看見自己的爛瞓樣。叉電位也照顧到粗心大意客人的需要，忘了帶插頭，可使用USB插位，夠貼心。床頭更附設小燈，方便入睡前玩手機或閱讀。午覺醒來，差不多日落，餘暉映襯汀九橋，梗係要影張相放上網！如在宿舍範圍，可於泳池旁取景，不過有燈柱阻擋，於旅舍出口轉左步行三分鐘，視野更廣闊，可以盡情大影特影。旅舍附近泳灘是較小型的近水灣，大家可乘巴士再步行前往較大型的汀九灣泳灘，和朋友吹吹海風玩玩水，不亦樂乎。

25米長的游泳池有遮蔭位，怕曬黑的人可躲在內。

落地玻璃的健身室24小時開放，望海做運動倍感心曠神怡。

交誼廳十分闊落，可和朋友及世界各地旅客玩board game。

旅舍設計富有外國青年旅舍特色，亦保留香港元素。

汀九灣泳灘位於旅舍附近，可乘坐234B巴士至汀九，步行五分鐘內到達。

旅舍外步行約三分鐘，可拍攝汀九橋的日落餘暉。

可煮食　切記自備調味料

肚餓了，想想晚飯如何解決。假日在地下的西餐廳吃自助晚餐，享用客人折扣後，每位仍要約$270，倒不如多住一晚更超值。想慳錢，旅舍內有杯麵賣，但未免有點自虐。識食梗係去荃灣食，不論小菜、西餐、掃街小食，甚至甜品應有盡有，食飽飽先返旅舍。愛烹飪的Fiona選擇買食材回旅舍房間煮飯仔，廚房有煎鍋、小煲、簡單廚具及餐具、微波爐等。和朋友齊齊煮，弄個兩餸一湯亦未嘗不可，記得自備調味料，晚餐才不會淡而無味。曾於本月初入住的友人溫馨提醒記者，才知道需自備洗潔精及百潔布洗餐具，醒目的Fiona當然做足準備，冇帶都有辦法嘅，就係喺旅舍購買。
至於洗澡方面，旅舍提供毛巾、洗頭水及護髮素等用品，但牙膏和牙刷需自備或購買，入住前要多加留意。嫌困在房間太悶，可於24小時開放的健身室及交誼廳玩樂，可容納數十人的交誼廳設有大富翁、星星棋、妙探尋兇等遊戲，更可觀賞電影及打機，但旁邊設有閱讀角及電腦叉電位給自修的學生，如有在埋頭苦幹的人就要降低聲量。

香港校園旅舍
http://www.campushk.com

摩星嶺旅舍　玩轉港島區

至於港島避世之選有同樣sell靚景的摩星嶺青年旅舍。在上環信德中心可坐免費穿梭巴士前往，客人先要付$150年費成為青年旅舍協會的會員，一個床位由$150起。旅舍有270°環迴觀景台，盡覽維港景致，天氣好更可遠望南丫島及坪洲。附近的軍事遺蹟群，更是二級歷史建築，旅舍設床位或雙人房給本地或外國旅客入住。

摩星嶺青年旅舍
https://www.yha.org.hk