今屆立法會選舉有父子檔，報名循港島區出選嘅詹培忠，佢嘅47歲大仔詹劍崙Ricky噚日趕搭尾班車報名循金融服務界出戰！
Ricky透露前晚決定去馬，因為業界唔少人不滿現任代表、即係經民聯張華峰嘅表現，所以叫人攞表填，噚日朝四出搵提名。4點鐘即係報名完結前一個鐘，佢原以為輕輕鬆鬆去交表，去到先知大鑊鳥，竟然冇簽聲明，嗱嗱臨出去搵律師監誓，最後報名完結前約10分鐘先到政總東翼，甩漏下發現冇簽到確認書。佢以為現場有提供，職員卻話要參選人自行下載，「結果冇簽，我係好想簽，第時可能補番」。
除咗張華峰，亨達董事總經理徐聯安都參選，但Ricky就對選情好有信心！