噚晚國冠盃澳洲區上演最後一場比賽，熱刺曾經兩中楣柱，最終被馬德里體育會嘅高甸一箭定江山，以0:1輸波。熱刺呢場出番基斯甸艾歷臣踢正選，上半場進攻有板有眼，踢得好過馬體會。喺七分鐘，艾歷臣就用一腳遠射試吓，對手門將奧比歷判斷出錯，但好在都撲到。三分鐘後，熱刺角球攻勢引發禁區混戰，小將約舒亞奧路馬勁抽一腳中楣。22分鐘，熱刺前鋒拉美拿同隊友撞牆打入禁區，心口一控，斜身一射，姿勢分滿分，可惜又射中柱。
之後馬體會企穩陣腳，雙方中場混戰居多。去到40分鐘，馬體會靠死球開紀錄，基比斬入禁區，熱刺的年輕中堅禾基斯頂後「助攻」，高甸加多腳射入；高甸雖然喺越位位置，但因為呢球係熱刺球員頂後，所以入球有效，馬體會半場領先1:0。熱刺下半場換入孫興民同賴恩美臣，進攻仍然悅目過馬體會。59分鐘，孫興民橫傳，美臣入楔禁區，窩利一射，被奧比歷救到。62分鐘，雲遜贊臣主射罰球，直取下角，但又過唔到奧比歷，最後熱刺喺攻勢較多之下都無法追平，以0:1不敵馬體會，喺澳洲踢兩場國冠盃都輸波。
今屆國冠盃澳洲區，祖雲達斯成績最好，踢咗兩場有四分，佢哋贏咗熱刺，同埋踢和墨爾本勝利之後輸12碼。