一帶一路係阿爺嘅寶貝，其實除咗特首梁振英，身兼全國政協副主席嘅前特首董建華都好重視，至於公務員對一帶一路有幾上心，八方真係唔知咯，只知梁振英搵嚟老董前愛將蔡瑩璧Yvonne出山，今年8月1日至明年6月30日出任一帶一路專員，而Yvonne呢次幫拖，係唔領薪兼夾直接向CY匯報，同一般安排好唔同！
65歲嘅Yvonne 1973年港大畢業後加入政府，曾做過香港駐日內瓦經濟貿易辦事處副代表，喺董建華治下做過政府新聞處處長；2012年退休前出任商務及經濟發展局常任秘書長。其實CY設立咗一帶一路辦公室負責具體工作，八方都唔明點解Yvonne嘅匯報係直上特首辦？到底Yvonne有乜職責？CY喺新聞稿中話喎，Yvonne會協助佢聯繫政府部門同社會各界，亦會向佢就制訂同執行一帶一路策略提供建議。