左丁山曾講及2017年係女人領袖世界，西方強國皆由女人話事。點知世事變幻無常，從7月14日突尼斯裔法國人恐襲渡假勝地尼斯開始，德國一星期後接連出現阿富汗裔（有說係巴基斯坦裔假冒）德國人，伊朗裔、敍利亞裔發動不同嘅暴力行動，包括斧劈、槍擊、刀斬、爆炸等行動，震驚德國，「難民之母」默克爾夫人立即飽受德國人責難，指控佢要為收容外國難民負全責，於是默克爾夫人明年是否可以連任，由穩陣變成危危乎。
IMF總裁拉嘉德本來地位鞏固，可領導羣雄多幾年，點知打官司甩唔到身，俾法國最高法院判定佢需要為Tapie（塔比）出售adidas案接受審訊（當財政部長時瀆職），如罪成可判監一年，罰款，倘若如此，IMF總裁一職難保。
至於希拉莉克林頓，本應穩勝特朗普，但電郵門醜聞揮之不去，今星期又爆出民主黨全國委員會偏幫佢，內幕全部洩漏，在維基解密可搵到，咁就激嬲晒左派對手桑德斯啲支持者，民主黨一如共和黨般分裂，選票未能鞏固，益晒特朗普。最新民調顯示兩人真正殺得難分難解，希拉莉分分鐘遭遇滑鐵盧。
上述三位女士下馬，本無關重要，最弊希拉莉嘅對手係特朗普，如果特朗普競選總統偷雞成功，世界會亂龍，特朗普、習近平與普京三人硬碰硬，禍福難料。
特朗普嘅經濟顧問曾放風，入主白宮後，特朗普會轉軚，唔會一味強硬到觸發世界貿易戰。殊不知，特朗普現在說話太多，太盡，做咗總統後想轉軚都未必咁易，例如佢接受NBC訪問，就竟然講到假如佢嘅貿易政策受世界貿易組織（WTO）批評，（如向美國公司海外製造貨物時抽取15%至35%關稅），美國會退出WTO咁話。
美國係世界最大市場，假如退出WTO，世界貿易秩序會亂成一片，中國香港出口商可能面對一個高關稅世界，一時之間無所適從，重回貿易保護主義年代，發生世界貿易戰，嚴重破壞世界經濟增長。
特朗普會否真的轉軚，似番個總統模樣？唔敢話唔會，但此人發起脾氣嚟噏得出就噏，好似係經濟學肥佬學生，美國股票目前顯然冇理會「特朗普貿易戰」呢個因素，究竟市場認為特朗普輸梗，唔駛理吖，還是認為「特朗普總統」一定轉軚，不會有貿易戰？謹慎投資者都係見高減磅較為好啲。