新媒體公司野士創工今年首次參加動漫節，首賣漫畫家謝森龍異最新作品《香港感染》，竟然吸引到民建聯立法會議員鍾樹根幫襯？原來因為漫畫故事有Tree根份，講佢帶主角逃離充滿病毒嘅立法會時感染變咗喪屍，現場仲有4米高嘅Tree根喪屍吹氣公仔畀人selfie。
「我真人靚仔啲！」
踩場支持新書嘅Tree根對變成喪屍嘅自己唔多滿意噃，「我真人靚仔啲，皮膚都滑溜啲啦！」但為咗支持本土創作，雖然形象有啲誇張都會接受，仲喺公仔腳邊扮喪屍，高叫：「嘩，發夢都諗唔到啦！咁紅！多謝晒！」佢笑指香港現時都有病毒感染，豪言要向立會議員每人送一本，首要係送畀大主席，「佢多橋嘛！等佢醫吓香港」。
項目總監張志偉話，今次創作全屬香港製造，覺得香港漫畫唔可以再悶嘞，希望大家多多支持，「唔好等人紅咗先發展其他嘢」。Tree根知道漫畫會開拍真人版後，耍手擰頭話唔可以喺電影中現真身，皆因自己唔識做戲喎，佢其後仲去咗VR區打自己（喪屍），真係瞓身支持。