有9個議席嘅新界西今年選情激烈，熱普城陣營繼國師陳雲前日報名選新東，熱血公民鄭松泰同埋自稱「國民香港（城邦派）」嘅中出羊子噚日不約而同報名參選新西，咁就真係好睇喇。齋睇報名中出羊子先勝一仗，佢唔只同鄭松泰一樣有簽確認書，仲即場親吻《基本法》！
不過講叠馬呢，鄭松泰就贏成條街，事關熱普城其他人好似黃洋達、鄭錦滿、黃毓民同埋陳雲都有現身。鄭松泰話佢會簽確認書，費事特區政府用行政手段做藉口留難佢。
到晏晝就輪到中出羊子，佢一個人拎住本好大本嘅《基本法》，加上一支美國國旗同龍獅旗去報名，霸氣！
佢都有簽確認書，不過喺確認書度加料，確認自己會如實履行政綱，「大範圍勾結外國勢力介入香港二次主權前途問題」，又話要更新或者廢除《基本法》第1條，即係香港係中國不可分離的部份嘅條文。咁咪即係港獨？佢就話佢都係擁護《基本法》，唔擁護又點更新、廢除呢？