各位小精靈訓練員！每日返工前放工後苦練多日的「拋精靈球絕技」終於有用武之地了，皆因全球第一個非官方的「Pokémon GO！大賽」正式宣佈舉辦香港站。據了解，今次比賽係由6位90後香港玩家組成的網上平台Pokégame自行舉辦，比賽宗旨係為咗召集各方志同道合嘅玩家，誓要一起令Pokémon熱潮再度升溫！發言人表示，初時構想是圍內朋友玩玩算，大家商量之下發現有得搞喎，於是四出尋找贊助商，又開設fb專頁「Pokégame」接受報名。
比賽的大日子是2016年8月6日星期六，以旺角作為起點，要求各訓練員於最短時間內去三個不同的地點捕捉12隻指定的小精靈，最後將收集到的小精靈交回給「研究所」的大木博士以計算賽果。不過，雖然現時仍未知道起點和研究所的確實地點，但Pokégame發言人話，大木博士人選會好有驚喜，令人好期待啊！
記者建議，各位訓練員要把握時機去多啲PokéStop到轉多幾吓，儲備充足的精靈球去應戰。當見到任何小精靈出現都唔好猶豫，就算是一街都係的「公廁系」精靈波音蝠都立即出球啦！唔好放過每一個練習拋精靈球的機會，記者招「迴旋球」都係咁樣練番來的。
聽講報名反應好熱烈，已經超出預期人數，有超過600人報名，我都趕住去報名喇！方法好簡單，就係去Pokégame fb專頁，同時讚好和分享Pokégame的比賽post和主頁面，之後填寫報名表格就得，合資格的訓練員會收到確認電郵。 星期六兩點正約定你，話唔定「寵物小精靈大師」嘅殊榮隨時落喺你手中！祝大家到時一拋必中！
記者：吳業紅