思考題：書展朱生話雞排妹寫真留返自己用，究竟係點用？
「我絕對唔係一個毒L嚟！」呢句說話由朱生把口講出嚟，認真擲地有聲！
23歲嘅朱生同好多香港人一樣，每日都係返工等放工，庸庸碌碌咁過日子。直到有一日，朱生為咗買到佢心中女神「雞排妹」嘅寫真，擔心遲咗會賣晒嘅佢，喺今年書展開鑼前一晚嘅凌晨3點就去排隊，更加霸到第二位。但好不幸地，朱生跑勻成個會展都揾唔到雞排妹（鄭家純）2016個人寫真《純》嘅寫真，原來本寫真仲，印，緊……。佢跑步嘅颯颯英姿、優美嘅步幅加上緊張嘅聲線，全香港人都感受到。
當全世界都笑佢戇居，話佢係「毒L」嘅時候，佢呢份純真同埋傻勁卻搏得女神一笑，「雞排妹」唔止親自喺fb留言畀佢，仲話會送本有親筆簽名嘅寫真畀佢。結果一班勁葡萄嘅網民即時嚟個180度轉呔，封朱生為「毒L之光」同埋「寫真權威」，仲讚佢「X（數字）到盡頭便是型」。對於網民畀佢嘅各種稱號，生性豁達又樂觀嘅朱生就話「得啖笑」。但有一樣嘢，佢好想透過呢個訪問澄清，就係「我絕對唔係一個『毒L』嚟！」
今次朱生接受蘋果訪問，除咗真情剖白對「雞排妹」嘅愛，更會公開佢嘅感情世界同埋擇偶條件。究竟朱生點揀女朋友，睇樣？睇身材？抑或「why not both」？即刻去片啦！
採訪：植詠珊（Cathy）﹑Roy
攝影：馮峰、Neo
場地提供：榮式燒雞扒 銅鑼灣分店