由前特首董建華牽頭搞嘅團結香港基金頻頻有動作，搵嚟一班商界領袖同專業人士組成「商社聚賢」，噚日就舉行啟動禮。
由老董搭台，活動請到政務司司長林鄭月娥主禮，大會主持仲竟然係有AO歌王外號嘅民政事務局前常任秘書長楊立門，八方聽聞佢冇加入基金會，今次以個人身份幫吓手，佢笑言商社聚賢係跨界別組織，但離開官場之後，都唔知自己屬於乜界別。八方見佢噚日做司儀有板有眼，認真唱得又talk得喎。
行會成員陳智思擔任商社聚賢召集人，噚日致辭時似意有所指，話團結香港基金唔係一個政治平台，目的係團結香港，要有各持份者參選，唔係一個人霸晒。語鋒一轉，叫台下嘅林鄭將來不論轉做邊個角色或者平台，都要繼續支持佢哋嘅工作。