超欣前日晏晝同女性朋友一齊到中環ifc食飯，仲耷低頭玩電話，唔留心啲都見佢唔到。玩得咁專心，咪就係玩緊Pokémon GO囉，佢同朋友一路行去搵嘢食，一路撳電話，超欣沿途遇到唔少小精靈，睇個開心樣應該收穫豐富。超欣狂熱程度非常高，睇住Menu都撳唔停，遇到小精靈仲直接遞畀朋友要對方幫手捉住先。成餐飯超欣大啖大啖咁扒，爭取時間玩電話，就連賣單都係極速進行。食完飯，超欣話就話陪朋友行街睇化妝品，不過佢由得朋友自己揀，自己企埋一邊掛住打機！
之後兩個人行去連卡佛，超欣一踏上扶手電梯，就擰轉身背住上面同朋友傾偈，差唔多到另一層先擰轉身，落睇去真係好危險！連卡佛除咗係名店，仲畀超欣遇到稀有小精靈，令佢要同朋友停低喺門口企定定捉，超欣成程放低警戒，玩咗好耐先發現記者，尷尬之下兩個人即刻行入連卡佛，記者見佢玩多一陣，先收埋手機唔再捉小精靈。