行政會議網頁噚日公佈一年一度嘅官員申報，可能市道麻麻大家睇唔清，官員今年嘅申報項目同去年一模一樣，有樓嘅繼續有咁多樓，冇樓嘅繼續冇樓。創新及科技局局長楊偉雄繼續做樓王，喺香港同美國各持有5個物業，冠絕一眾高官。
14位高級官員中，超過一半都喺香港以外嘅地方有物業，梁振英同佢龍蝦老婆梁唐青儀喺新加坡同英國分別有2個物業，呢啲咪係「家是香港」嘅最佳典範囉，反觀梁振英喺香港只有3個物業。
財爺 奶媽 一個起兩個止
至於叫大家拭目以待睇佢選唔選特首嘅政務司長林鄭月娥，繼續只申報由佢老公喺中山市持有嘅1個住宅同1個車位。
至於人氣高企嘅財政司長曾俊華，就有1個喺美國紐約嘅物業自用，另外有1個喺灣仔嘅物業就用嚟出租。
其他局長中，最愛磚頭嘅除咗楊偉雄，梗係要數有9個物業嘅勞工及福利局長張建宗，佢最愛喺東區置業，1個東區物業畀屋企人住，4個同區住宅就用嚟收租，佢老婆仲喺同區有商業單位用嚟收租。計埋張建宗份一個月幾十萬嘅人工，真係相當叠水。至於以往都係冇申報擁有物業嘅張雲正同劉江華就繼續無意置業。
其他司局長持有物業數量
財政司長曾俊華：1個香港、1個美國
律政司長袁國強：2個香港
勞福局長張建宗：9個香港
發展局長陳茂波：3個香港、3個悉尼
食衞局長高永文：4個香港、1個中山
教育局長吳克儉：4個香港
運房局長張炳良：2個香港、1個悉尼
環境局長黃錦星：2個香港、1個溫哥華
財庫局長陳家強：2個香港
商經局長蘇錦樑：2個香港
政制局長譚志源：1個香港、1個溫哥華
保安局長黎棟國：2個香港
公務員事務局長張雲正、民政局長劉江華：無持有
資料來源：行政會議網頁
李八方
mailto:[email protected]