韓星近年熱爆中港台三地，但近日有消息傳出，內地將大肆封殺韓星，凡有韓星演出嘅劇集、廣告、表演全部殺無赦！消息指李英愛復出主演嘅《師任堂》劇集將冇得播，甚至傳聞內地女星楊冪買下嘅韓劇《她很漂亮》版權，原訂改編拍內地版，𠵱家都被叫停！
有傳事件可能同政治問題拉上關係，因韓國同美國唔理內地反對，部署薩德導彈系統，所以引起內地反擊以封殺作大報復！以後韓星將會禁踏足內地搵真銀，斷晒賺人仔嘅米路。
《師任堂》首當其衝
由於傳言只喺內地演藝圈傳出，暫時未有官方證實事件。至於冇拍劇11年嘅李英愛，復出之作《師任堂》原訂於9或10月喺湖南衛視播出，𠵱家卻傳被內地禁上，馮仁昭向有份投資嘅英皇求證，CEO吳雨喺電話否認：「冇咁嘅事，仲未定播出日期，一切依舊進行。」問到有否聽聞內地禁韓星？佢話：「聽過吓，但唔知詳情，消息真定假都唔知，要了解吓先，唔會擔心。」
至於寰亞早前簽咗唔少韓星好似河智苑等，寰亞高層陳志光就話：「我哋正了解到底範圍有幾大，正向內地電視台同埋網站了解影響有幾大，不過我哋冇旗下韓星演出內地電視應該唔受影響。」