【本報訊】人稱「志雲大師」嘅商台首席智囊陳志雲去年以2,210.1萬元買入嘅北角柏傲山終於租出。消息稱，柏傲山3座高層C室，實用716方呎，1個半月前放租，叫租4.2萬元，未有承接，惟有減價，剛以4萬元租出，呎租56元，屬市價租出。
陳志雲去年雖然官非纏身，但仍不忘換樓，以2,210萬元買入新世界（017）北角柏傲山一個716呎嘅單位，當時被記者發現佢將何文田層舊樓拎去加按，後尾佢澄清，只是套現拎首期買柏傲山啫！
當時佢又話舊樓成1,900方呎，唔使住咁大，所以大樓換細樓，仲話遲啲多數會搬去柏傲山住。呢頭講完，何文田層樓就話以3,100萬元沽，賬面勁賺1,900萬元，幾乎夠晒填柏傲山購買價。據知目前他以8萬元租山頂文輝道前政府宿舍2,300餘方呎單位。
陳志雲在接受本報查詢時不回應租出事宜。