餐廳R去完意大利公幹/美食之旅後，返到香港就上陸羽飲茶，對律師W講，有一間意大利食物批發商想來香港設立公司，開拓中國農產品市場，希望買入中國產品運去意大利及歐盟出售。呢行生意當然已經競爭激烈，但從中國買貨通常容易過向中國賣貨，餐廳R話呢間意大利批發商有唔錯嘅意大利餐館網絡，有信心推銷高檔中國食材喎。
本來香港百幾年來就係做呢啲「洋行生意」賺錢，外商在香港成立公司，向中國買貨，轉手賣去歐洲，中間賺差價、利錢留在香港，順便為香港增加白領文員職位，何樂而不為。目前嚟講，商務批發係香港四大經濟支柱之一。點知律師W即刻潑冷水，對餐廳R講：「我唔會同你成立呢啲公司嘞，太麻煩，開銀行戶口全無把握，分分鐘幾個月都未掂，又收得你個朋友幾多錢，你索性用你間公司同意大利批發商買賣中國農產品食材啦！」餐廳R苦笑：「我都想賺啲過水濕腳，但人地公司有自己生意門路，老友還老友，點解要委託我做，等我知道晒佢啲生意機密？」律師W話：「金管局與銀行嘅目前首要任務係打擊洗黑錢，萬事從嚴，生意可以唔做，總之合規第一。」
唔怪得香港經濟增長會放緩，經濟學家如果唔懶惰，大可計算吓合規成本及KYC、AML呢啲銀行守則總共拖低GDP增長若干百分點。記得王于漸教授一篇大文引述過美國方面有經濟學教授研究，大學法律學院學生多過工程學院學生嘅地方，經濟增長較慢，原因係律師供應增加，只會管呢樣、管嗰樣，阻住地球轉，一味注重防弊，而工程師就較有創意，願創業、製造新產品，推動經濟向前。香港嘅情況就係法律學院只有三間，大學生主修工程嘅會比法律多，之不過，考DSE成績，就係法律學生叻幾多，學生入唔到醫法商學院，先至入讀工程學院，咁就弊啦，即係話叻仔叻女將來負責合規、監管、守龍門，讀中學時冇咁醒嘅人就去搞科技生產，後果可想而知。美國方面曾經有人呼籲，美國最叻嘅讀書尖子去讀STEM科目，唔好讀法律醫科，香港或者更需要如此。律師W聽咗餐廳R與左丁山嘅意見，哈哈大笑，佢話：「唔怪得中國經濟增長快過好多國家，因為中國律師係離奇職業，隨時被拉去坐監，所以中國盛產工程師，少人讀法律。」哎，律師W講得有理，但我地聽咗，笑中有淚呀！