自從星期一《Pokémon GO》正式登陸香港，全港進入一級戒備狀態，生產力急速下跌，港股成交500億都無，成個facebook除咗精靈同攻略，似乎都冇其他生活，連平時宅在家中的毒男亦群湧而出，30幾度熱辣辣個個都周街走，帶挈便利店及賣飲料的舖頭貨如輪轉。
玩咗4日，各大商場都好識得用道具吸客，日日無間斷灑櫻花，仲有攻略及情報，睇嚟都相當有效。今日越野兔玩玩吓facebook突然見到左邊欄廣告，原來連夜店Magnum Club都買重廣告，用櫻花Lure Module吸客！
個腦即刻出現咗個好好笑嘅情景，烏燈黑火、紙醉金迷的夜店內，DJ狂播Pokémon主題曲混音版，舞池內的美女不再扭動身體，大家齊齊企定定，手指不停向上滑捉精靈，男士唔怕無着落，捕捉唔到囡囡都可以捕捉下比卡超；bartender除咗賣酒，仲要賣埋流動充電器……
夜店出動Pokémon攻勢吸客亦不難理解，近一兩年經濟轉差，蘭桂坊風光已不如以往。夜場生意雖然毛利高，但競爭一向大，加上北方佳麗及土豪充斥夜店，潮人蒲友又點會鍾意，好多已經轉晒去私竇玩。
港股唯一一隻夜店股奧克斯國際（2080，前稱Magnum）雖然已經易主加改名，不過受上市條例所限，手上仍然持有會所業務，睇番上年業績，集團只剩下兩間會所Magnum Club及Zentral，其餘兩間會所Beijing Club及DIZZI亦分別於去年9月及10月結業，令到集團2015年收入按年跌16.7%，虧損更錄得2,600萬元；加埋《Pokémon GO》嘅殺傷力……我都係去公園捉小精靈先喇！
越野兔
https://www.facebook.com/Sailorrabbit/
本欄逢周五刊出