財務H、律師W等幾位專業人士因公事開會三小時之後，相約前往一間純吃飯別無其他設施嘅私人會所食晚飯，飲咗兩支紅酒之後，公事已經傾掂，於是人人變身做時事評論員。2012年梁振英上台後，香港發生好多不明不白之事，搞到陰謀論滿天飛，無人相信官方言論解釋，總係喜歡猜測中央有何密令指示西環，又由西環傳遞信息俾天馬艦「做嘢」等等，既然人人都唔知答案，位位街坊專家嘅分析都可能有啲啱，講古唔怕駁古，都幾過癮。專業人士見面食飯，唔講到政治時事確係好少見。
例如最近選舉委員會突然要求參選立法會人士簽署甚麼確認書，為以前所無，泛民代表在上星期二約見選管會主席馮驊之後，未能取得滿意解釋，於是一致決定拒絕簽署確認書。唔簽會唔會變成冇資格參選呢？大家到依家都未知，但如果唔簽都可以參選嘅話，馮驊及選委會誠信何存？玩嘢呀，叫馮驊辭職啦。
於是大家有嘢講，財務H話確認書一定要簽，否則梁振英冇法子「做到嘢」，難向中央交代，馮驊只係執行者，唔輪到佢說了算；律師W就話法律界人士都領略到馮官及另一位張官來自愛國背景家庭，比大部份人都根正苗紅，係有影響力㗎，之不過，例如泛民唔簽確認書，如被取消參選資格嘅話，大可申請司法覆核（JR），一旦採取JR行動，律師H話如果純睇法律，泛民贏面甚大。
乜律政司事先冇俾過法律意見嘅咩，推出新確認書條文之前，應該考慮過JR嘅可能性嘅啫？律師W話有時候政治掛帥，梁政府為求達到「做嘢」要求，又未必考慮到百分百嚴密嘅。之不過，如果係政治行先，西環會幾頭痛，大教授劉兆佳就講中央願意負上政治後果噃。佢地諗唔到嘅係，相對溫和嘅泛民（反獨立）一致決定唔簽確認書，反而以推動港獨為宗旨嘅熱血公民成員鄭錦滿報名參選時就毫不猶疑咁簽咗確認書，於是滑稽事件可能發生嘞，「獨派」參選就得，反獨泛民參選就唔可以？萬一九月四號直選部份，選晒獨派人士入立法會，西環豈不面青？防獨確認書豈非廢紙一張？俗語有云，聰明反被聰明誤，愛國頭腦發熱起來，掛萬漏一呀！