收購咗本地老牌券商平安證券嘅盛明國際（231），今年初改名叫「平安證券集團控股」，點知俾平保（2318）要求佢改名，事關佢同平保旗下平安證券撞名。根據公司註冊處最新資料，231已經跪低，改名為「萬安證劵集團」。
噚日231召開股東特別大會，管理層冇見傳媒，似係避談改名一事。在場唔少小股東異口同聲咁話，呢間231「成日改名㗎，改完又改，好亂！」所以就算再改，佢哋都冇乜感覺。
講番改名呢件事，盛明買嘅平安證券早於上世紀70年代已經紮根香港，論資排輩，平保都係1988年先成立，旗下中國平安證券（香港）更加喺2009年先出現。不過，聞說平保諗住分拆平安證券上市，點可以俾人混淆視聽呢？買錯沽錯咁點算？