今屆立法會選舉，選管會忽然僭建確認書，要求參選人簽署表明擁護香港係中國不可分離一部份等《基本法》條文，無論簽唔簽確認書，都有可能收到選舉主任查問係咪繼續主張同推動港獨，政治審查、白色恐怖浪接浪，本土派參選人為咗保證入到閘，紛紛戴頭盔表明「吾擁護《基本法》」。
好似青年新政新西參選人黃俊傑就夥拍青政召集人梁頌恆拍片，改編電影《少林足球》中周星馳同黃一飛合唱嘅一幕，高唱「基本大法勁，係好勁」，表明「齊齊擁X基本大法」，片尾仲特別提及「選管再打壓 擁X基本法」，仲向選管會主席馮驊、新東選舉主任何麗嫦「致敬」。
梁頌恆喺青政facebook專頁話，「為咗擁X基本大法，我人生嘅底線首次低過條底褲」，佢仲話如果因為呢一身造型而冇咗女粉絲，佢一定搵馮驊算賬。