書展噚日收爐，全國人大常委范徐麗泰都有現身，但唔係掃平貨，而係同年輕人分享閱讀心得，推介吳吉平嘅《中英會談風雲錄》，話呢本書好中肯咁講述中英如何達成《中英聯合聲明》，覺得時下年輕人應多啲了解香港嘅歷史。范太自爆從政初期無法接受同自己相反嘅意見，但𠵱家學識咗，覺得咁樣先會令自己進步，但有啲「害」香港嘅意見佢就話一定唔會聽喎。
范太話自己鍾意讀唔同類型嘅書籍，作為女性，愛情小說冇可能唔睇，但就坦言唔會睇食譜，唔通一直係無飯婦人？
分享完睇書心得，佢又講到從政一直唔係自己嘅志向，話小時候希望成為貨櫃車司機，因為細個屋企人多，覺得揸車可以享受一個人嘅自由，其後諗過做武打明星或球員，但父母都反對喎。