平生不識小豪子，就稱處長也枉然。早前香港電台舉行員工大會，就署理助理廣播處長陳敏娟未能坐正一事促廣播處長梁家榮交代。喺《頭條新聞》扮演小豪子而廣為人知嘅節目主持曾志豪，當日諗住提問，點知俾副廣播處長（節目）廖麗怡同梁家榮質疑佢係合約制員工（CAT II），「呢個唔係員工」，台下譁然。
港台節目製作人員工會近日喺fb專頁發起一人一hashtag活動，呼籲港台員工將印有「#CAT II是港台員工」、「#NCSC（非公務員合約）是港台員工」嘅標語貼喺座位，或者手持標語影相貼喺fb以示支持，節目主持人麥嘉緯同黃雅文都有響應。
工會重申，無論CAT II定NCSC，都係支撐港台嘅重要一員，所有關心港台嘅同事都有權出席員工大會同提問。