祖雲達斯幾個球星嘅狀態都唔錯，香港球迷有眼福嘞！喺噚晚場澳洲區嘅國冠盃入面，射手保羅戴巴拿同中堅貝拿迪亞喺上半場各入一球，幫祖記以2:1擊敗熱刺。祖記星期五先會嚟香港，備戰周末對南華。
祖記喺第一場國冠盃燒鬚，法定時間贏唔到墨爾本勝利，仲喺互射12碼輸埋。去到噚日嘅第二場，佢哋面對熱刺，就靠初段打穿對手年輕嘅防線。由於維頓漢同艾達韋列特等未返，所以熱刺嘅四人防線入面，有三個都係後生仔，結果一開波就交學費。熱刺嘅20歲中堅杜明歷波爾喺後場犯錯，被祖記嘅羅拔圖佩雷拉搶咗個波，佩雷拉唔貪功，畀咗位置更好嘅戴巴拿射入，喺六分鐘就打開紀錄。呢位阿根廷前鋒係祖記上季嘅首席射手，亦係東征名單入面其中一名最大牌嘅球星，佢今場腳風咁順，下場對南華話唔定可以為香港球迷炮製精采入球。
熱刺新兵雲遜贊臣啞火
講番場波，祖記壓住嚟攻，去到14分鐘，祖記開角球，杜明歷波爾、卡達域卡斯、威廉米拿等熱刺小將騰晒雞，解圍唔清脆，比真歷喺禁區外攞到波，斬番入去，畀貝拿迪亞頂成2:0。呢次兩大新援合作，比真歷展示出色嘅傳球能力，而貝拿迪亞亦攻入加盟後首個入波。之後熱刺班後防定番少少，冇再有咁多空位，但孫興民、湯卡路爾等進攻中場擦唔出花火，新加盟嘅中鋒雲遜贊臣亦被祖記後防凍結咗，所以熱刺上半場連一次中目標攻門都冇。換邊後，祖記陸續將佩雷拉、貝拿迪亞同比真歷等換走，熱刺搶番唔少攻勢，其中後備入替嘅拉美拿喺67分鐘破蛋，但最後祖記都以2:1贏波。戴巴拿幾乎踢足全場，到80分鐘先被換走。
鬥南華門票已售五千張
踢完呢場波，祖記會喺澳洲操多兩日，禮拜五先嚟香港。到港後，佢哋晏畫五點開記者會，之後操練，到禮拜六下晝四點就會喺大球場友賽南華。各位球迷除咗要捉小精靈之外，記得仲要捕捉斑馬兵團呀！至於南華聽日就舉行拜神儀式，後日朝早會晨操備戰鬥祖記。暫時南華對祖記場波賣咗約5,000張飛，南華亦會派飛畀弱勢社群，等佢哋星期六入場感受足球氣氛。
另外，仲放緊假嘅熱刺前鋒哈利卡尼有好消息宣佈，就係佢要做老竇嘞！佢日前喺twitter話：「我同女友姬蒂好開心，我哋第一個小朋友就嚟嘞，急不及待嗰一刻嘅來臨！」
