「人逢喜事精神爽」呢句話，噚日最啱用喺銀娛（027）主席呂志和身上，受惠「行家」金沙（1928）話上月中場收入錄得增長，連帶銀娛股價急升6.5%之餘，佢冠命嘅「呂志和獎──世界文明獎」，噚日亦公佈首屆獲獎名單，難怪佢出席活動嗰陣，全程笑笑口，心情相當唔錯。
可能正因為太過開心，佢平時都會評論一兩句賭業與樓市，今次反而冇乜點講，只係話「呢啲係小問題，你哋搞掂呢啲人和，搞掂個個都賺大錢……最緊要你哋呢，高興、香港繁榮，人和萬事興，咁就最好喇」。講到人和，CY就真係要聽佢老人家講喇。
至於「呂志和獎」獲獎人，分別由有「雜交水稻之父」之稱嘅袁隆平獲得「持續發展獎」，無國界醫生獲得「人類發展獎」，美國前總統吉米．卡特獲「正能量獎」，三個獲獎人分別會獲得2,000萬元獎金。
獎項推薦委員會主席劉遵義話，冇限制獲獎人點樣利用呢筆資金，但相信會繼續用於科研同幫助社會。點都好，恭喜晒！