噚日香港中華廠商聯合會宣佈，將會喺今年10月推出「網上工展會」平台，畀香港品牌以O2O（線上線下）推廣，市民足不出戶就可以購物。講白啲，咪即係搞網購囉！
家陣好多人網購，廠商會會長李秀恒都係其中一份子。佢透露，最近佢屋企準備裝修，所以一得閒就上淘寶揀傢俬，話貪方便同款式多。
至於網上版工展會，李會長話，商界反應唔錯，已有幾十個品牌確定參加，希望年底前至少有200個，呢個網上工展會係會一直經營落去，無時限。
不過家陣好多公司都有推網上平台，競爭唔細，李秀恒就認為，網購市場好大，仲有得做，而且商戶會提供優惠。
講到近日hit爆嘅《Pokémon GO》，李秀恒亦準備下載玩，仲話要同囡囡交流心得㖭！