呢排紅館好熱鬧，除咗67歲殿堂級歌手徐小鳳會喺聽晚開8場、盛傳係最後一次嘅演唱會，下月紅館仲有一場吳業坤個唱同埋兩場向雪懷嘅作品展。不過，前日就傳出小鳳姐銷情告急，話只有大後日30號嗰場較好賣。
「習慣開場先買」
馮仁昭即刻上網睇，發現後日29號嘅380同280元飛有連位，而周日31號280元都仲有連位㖭，貴飛780元就只得單丁位。問過主辦單位，佢哋就話有單丁位賣剩一啲都唔出奇，因為好多歌迷習慣開場先買飛，仲話小鳳姐已經為個唱做好準備，相信到時會令觀眾眼前一亮。
咁坤哥嘅演唱會門票銷售情況又點呢？噚日馮仁昭去尖沙嘴通利琴行售票處睇過，雖然最貴480同380元門票已賣晒，但中價嘅280同山頂180元飛仲有得賣，而且呢個局面喺預售第一日已經係咁，即係話冇乜點變過，而接住坤哥喺下月12、13號開作品展嘅向雪懷，兩場180元平飛已經賣晒，頭場嘅680元貴飛亦同樣沽清，其他位就仍然有得賣。
撰文：馮仁昭
