【《蘋果》專訪】現年47歲的伍詠薇和廣告人練海棠，本月初剛慶祝結婚17周年，但上月練海棠被爆背妻帶34D長髮女匿車廂密會兩粒鐘。面對小三疑雲，伍姑娘除一句「玩完要老婆執手尾」，還代夫道歉，堪稱「EQ女王」。犀利人妻伍姑娘嫌練海棠性格過於猶豫，她日前在銅鑼灣接受本報專訪時表示，假若夫妻間相處不來，她會果斷離婚，絕不拖泥帶水。
伍姑娘拒絕做EQ女王，她說：「邊個會鍾意呢種EQ同回應，不過都多謝讚我。」又否認事後審問老公：「一對同居情侶或夫妻間，唾罵愛人係冇意思，問題係要拎嚟解決。」她選擇用沉默懲罰老公：「大家沉澱吓，沉澱完就傾番偈，繼續我哋嘅生活，我唔會鬧一個我愛嘅人。」
「唔啱就離婚」
兩人結婚17年甚少嗌交，炒鑊甘是婚後不久發生，當時伍姑娘北上拍劇集《大唐雙龍傳》，有晚致電練海棠時發現他夜蒲有女聲，她即質問：「我話『點解有個女仔咁嘈，阿吱阿咗摩洛哥，你靜啲先打番畀我』，然後收線。」伍姑娘坦承時惡時溫柔，具備雙重性格：「我係難以觸摸，30幾歲後成熟咗，鬧係冇意思，不如諗個方法大家相處得快樂。」她亦不會為死守練太名份受委屈：「唔啱就要離婚，話之你『練太』定『煉奶』，我幾任性，唔得就分開做朋友好過。」問到她對老公有期望嗎？她抵死說：「咁就有，佢都要畀錢我使㗎。」
最嫌諗得太多
夫妻間必須包容，伍姑娘僅數到老公一樣缺點：「佢決定嘢冇我咁快，猶豫啲。」二人可從媾女事件上有所領悟？她寸嘴說：「我冇諗過我要學習啲乜嘢，可能經一事，老公更愛我，佢見到我處理呢件事咁冷靜，永遠唔知自己底線，唔好挑釁自己底線。我會盡量保護呢段關係，佢都受傷害，男人其實好脆弱。」伍姑娘自評人妻表現有90分，衰在不會下廚。
此外，訪問當日，伍姑娘還接受挑戰心理測驗，結果證明她是理性型。
採訪：陳杰